រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា ក្នុងរយៈពេល៧ឆ្នាំចុងក្រោយនេះ ក្រសួងបានអនុម័តគម្រោងចំនួន២១៣ និងមានទំហំទឹកប្រាក់វិនិយោគសរុប៣.៣៧៥លានដុល្លារអាមេរិក ។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងពិធីបើកសិក្ខាសាលា ស្តីពីនីតិវិធីច្បាប់ និងការវិនិយោគវិស័យសំណង់ និងអចលនវត្ថុកម្ពុជា ដែលរៀបចំដោយសមាគមអ្នកអភិវឌ្ឍន៍លំនៅឋានកម្ពុជា នាព្រឹកថ្ងៃទី៦ តុលា ថា ក្នុងរយៈពេល៧ឆ្នាំចុងក្រោយនេះ ក្រសួងសេដ្ឋកិច្ចបានផ្តល់អាជ្ញាប័ណ្ណវិនិយោគក្នុងវិស័យសំណង់ចំនួន២១៣គម្រោង ក្នុងនោះបុរី១៣២គម្រោង ព្រមទាំងគម្រោងខុនដូ និងគម្រោងផ្សេងៗជាច្រើនទៀត ដែលមានទុនវិនិយោគសរុបចំនួន៣.៣៧៥លានដុល្លារអាមេរិក ។ លោកជំទាវបន្តថា វិស័យសំណង់បានរួមចំណែក១ភាគ១០នៃផលទុនជាតិសរុប និងបង្កើតសកម្មភាពការងារជាច្រើន ។
លោកជំទាវបន្តថា ៖« ការរីកចម្រើននៃវិស័យសំណង់ បានឆ្លុះបញ្ចាំងពីការរក្សាបាននូវសុខសន្តិភាព កំណើនសេដ្ឋកិច្ច និងការរក្សាបាននូវស្ថិរភាពម៉ាក្រូសេដ្ឋកិច្ច និងសង្គម។ ទន្ទឹមនឹងនេះ បានបង្កើតការងារដោយផ្ទាល់ និងប្រយោលជាច្រើន ដែលបានរួមចំណែកដល់ការអភិវឌ្ឍសេដ្ឋកិច្ចប្រកបដោយបរិយាប័ន្ន » ។
ប្រធានសមាគមអ្នកអភិវឌ្ឍន៍លំនៅឋានកម្ពុជា លោកឧកញ៉ា លី ហួរ បានថ្លែងថា ការរៀបចំសិក្ខាសាលានេះ ពិតជាមានសារសំខាន់ ដើម្បីឆ្លើយតបនឹងស្ថានភាពនៃការវិនិយោគក្នុងវិស័យសំណង់ និងអចលនវត្ថុកម្ពុជាកាន់តែល្អប្រសើរថែមទៀត ។
លោកបន្តថា សមាគមមានសមាជិកចំនួនជាង៤០ក្រុមហ៊ុន ដែលជាក្រុមហ៊ុនវិនិយោគធំៗ។ លោកថា ការបង្កើតសមាគមនេះ ធ្វើឡើងក្នុងគោលដៅចែករំលែកបទពិសោធន៍គ្នា ដើម្បីស្វែងរកភាពរីកចម្រើនក្នុងវិស័យនេះ ក៏ដូចជា តំណាងសំឡេងមួយពីវិស័យឯកជន ដើម្បីធ្វើការកាន់តែជិតស្និទ្ធ និងលើកជាសំណូមពរពីបញ្ហាប្រឈមនានាជូនរាជរដ្ឋាភិបាលផងដែរ ។
យោងតាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ទុនវិនិយោគក្នុងវិស័យសំណង់រយៈពេល៧ខែឆ្នាំនេះ មានទំហំទឹកប្រាក់ជាង៥ពាន់លានដុល្លារអាមេរិក ៕