Hot line: +855 (0)99 283 388
នៅថ្ងៃនេះទី៣០ ខែវិច្ឆិកា បន្តដល់ថ្ងៃទី២ ខែធ្នូខាងមុខនេះសមាគមអ្នកសាងសង់កម្ពុជាសហការជាមួយក្រសួងរៀបចំដែនដី នគរូបនីយកម្ម និងសំណង់បើកមហាសន្និបាតបូកសរុបការងារប្រចាំឆ្នាំលើកទី៣ និងពិធីតាំងពិព័រណ៍ឧស្សាកម្មសំណង់កម្ពុជាឆ្នាំ២០១៧ នៅមជ្ឍមណ្ឌលសន្និបាត និងពិព័រណ៍កោះពេជ្រ។
កម្មវិធីនេះមានការចូលរួមក្រោមគណៈអធិបតីលោក ជា សុផារ៉ា ទេសរដ្ឋមន្រី្ត រដ្ឋមន្រី្តក្រសួងរៀបដែនដី នគរូបនីយកម្ម និងសំណង់លោក ឃួង ស្រេង អភិបាលរាជធានីភ្នំពេញ ប្រធានសមាគមអ្នកសាងសង់អាស៊ាន និងអាស៊ីបាស៊ីហ្វិក និងបណ្តាក្រុមហ៊ុនសំណង់ជាតិ និងអន្តរជាតិចំនួន១៦៨ក្រុមហ៊ុន ដើម្បីគាំទ្រជាកិតិ្តយសក្នុងការរៀបចំកម្មវិធី។
លោក ស៊ីវ ផេង អ្នករៀបចំកម្មវិធីពិព័រណ៍ឧស្សាហកម្មសំណង់កម្ពុជាឆ្នាំ២០១៧ និងជាជំនួយការរបស់អ្នកឧញ៉ា ពុង ឃាវសែ ប្រធានសមាគមអ្នកសាងសង់កម្ពុជានៃអណ្តិតទី៣ បានប្រាប់កាសែតភ្នំពេញប៉ុស្តិ៍អចលនទ្រព្យថា ៖ «គោលបំណងនៃការប្រារព្ធកម្មវិធីនេះ គឺដើម្បីបង្ហាញពីការរីកចម្រើន និងការអភិវឌ្ឍរបស់ប្រទេសដូចជាវិស័យសំណង់ដែលមានអគារខ្ពស់ៗកើនឡើងច្រើន និងបង្ហាញពីភាពស៊ីវិល័យនៃការប្រើប្រាស់សម្ភារបរិក្ខារសំណង់ទំនើបៗដូចនៅប្រទេសជឿនលឿនដទៃទៀតដែរ»។
ដោយទីផ្សារសំណង់នៅប្រទេសកម្ពុជាមានភាពទូលំទូលាយ លោកបានប្រាប់ថា ការដាក់តាំងពិព័រណ៍នេះចង់ផ្តល់ឱកាសដល់អ្នកវិនិយោគ និងអ្នកអភិវឌ្ឍន៍វិស័យសំណង់បានជួបជុំពិភាក្សាគ្នារកដំណោះស្រាយនៃចំណុចខ្វះខាតដើម្បីពង្រីងវិស័យមួយនេះ។
លោកបន្តថា ដោយការប្រារព្ធកម្មវិធីសន្និបាតបូកសរុប និងពិព័រណ៍កាលពីឆ្នាំមុនៗមានការគាំទ្រប្រកបដោយភាពជោគជ័យ ការប្រារព្ធកម្មវិធីឆ្នាំ ២០១៧ នេះ ធំជាងឆ្នាំមុនដោយមានក្រុមហ៊ុនសំណង់ចូលរួមសរុបចំនួន១៦៨ក្រុមហ៊ុន ដែលមាន៣៦ក្រុមហ៊ុន ជាក្រុមហ៊ុនមកពីបទេស សរុបទៅគឺមានជិត ៣០០ ស្តង់។
លោកបានលើកឡើងថាពាក់ព័ន្ធទៅនឹងវិស័យសំណង់ក្នុងប្រទេសកម្ពុជាមានការកើនឡើងក្នុងរយៈពេល១០ខែ ប្រហែល២៧ភាគរយ បើប្រៀបធៀបទៅនឹង ឆ្នាំ ២០១៦ ហើយមានទឹកប្រាក់សរុប ៦២៦៧លានដុល្លារ។
លោកបណ្ឌិត តាន់ មុនីវណ្ណ តំណាងអ្នកឧកញ៉ា ម៉ុង ឬទី្ធ អគ្គលេខាធិការសមាគមអ្នកសាងសង់កម្ពុជា បានឲ្យដឹងថា កម្មវិធីសន្និបាតបូកសរុបការងារប្រចាំឆ្នាំធ្វើឡើងជារៀងរាល់ឆ្នាំដើម្បីធ្វើការរាយការណ៍ពីការវិវវឌ្ឍរីកចម្រើននៅក្នុងវិស័យនេះដោយប្រធានសមាគមថ្មី និងក្រុមបឹក្សាភិបាលថ្មីបន្ទាប់ពីការបោះឆ្នោតជ្រើសរើស។
លោកបន្តថា ៖ «នេះគឺជាកម្មវិធីល្អមួយដែលផ្តល់ឱកាសដល់ក្រុមហ៊ុនសំណង់ចម្រុះជាតិ និងអន្តរជាតិចូលរួមដាក់តាំងពិព័រណ៍ពីគម្រោង និងផលិតផលសំណង់ ហើយយើងចង់ឲ្យអ្នកពាក់ព័ន្ធក្នុងវិស័យនេះចូលរួមឲ្យបានច្រើនដើម្បីស្វែងយល់បន្ថែម»៕