Hot line: +855 (0)99 283 388
ខណៈពេលដែលអត្រានៃការជួលការិយាល័យរបស់ក្រុមហ៊ុននានាបន្តកើនឡើងដោយមិនមានសញ្ញានៃការអន់ថយទាល់តែសោះក្រុមហ៊ុនមួយចំនួននៅទីក្រុងបាងកក កំពុងតែពិចារណាការទិញទីតាំងការិយាល័យជាជាងការជួលដូចទម្លាប់ធម្មតា ប៉ុន្តែបញ្ហាមួយដែលបានលេចឡើងនោះគឺកង្វះខាតទីកន្លែងឬលំហការិយាល័យដាក់លក់។ នេះបើយោងតាមសម្តីរបស់ក្រុមហ៊ុនពិគ្រោះយោបល់ទ្រព្យសម្បត្តិឈ្មោះJLL។
លោកស្រី Yupa Sathienpabayut នាយកផ្នែកជួលការិយាល័យនៅ JLL បានមានប្រសាសន៍ថា ៖ «តាមធម្មតាក្រុមហ៊ុននីមួយៗតែងតែផ្តល់ជម្រើសក្នុងការជួលដល់អតិថិជនដែលមានលក្ខណៈបត់បែនបានច្រើនជាងភាពជាម្ចាស់កម្មសិទ្ធិ។ សព្វថ្ងៃនៅក្នុងទីក្រុងបាងកកភតិសន្យា នៃការិយាល័យគឺមានកាលកំណត់រយៈពេល៣ឆ្នាំដោយមានការផ្តល់ជម្រើសឲ្យអតិថិជនចុះភតិសន្យាឡើងវិញបើសិនជាពួកគេជ្រើសរើសចង់បន្ត ដើម្បីឲ្យពួកគេមានភាពងាយស្រួលក្នុងការផ្លាស់ប្តូរទីតាំងការិយាល័យ»។
លោកស្រីបានបន្ថែមថា ៖ «ភាពបត់បែននេះគឺមានសារៈសំខាន់ណាស់ចំពោះក្រុមហ៊ុនដែលត្រូវការមានប្រតិបត្តិការឆាប់រហ័ស ទៅនឹងការផ្លាស់ប្តូរទីតាំងឬជួលបុគ្គលិក បចេ្ចកវិទ្យា អាជីវកម្ម និងស្ថានភាពទីផ្សារ ដែលកត្តាទាំងអស់នេះមានឥទ្ធិពលយ៉ាងខ្លាំងទៅលើតម្រូវការរបស់ការិយាល័យមួយចំនួន»។
លោកស្រីបានបន្ថែមទៀតថា ខណៈពេលដែលថ្លៃជួលបន្តមានការកើនឡើងក្នុងអំឡុងពេល៧ឆ្នាំជាប់ៗគ្នានេះហើយនិន្នាការមើលទៅនឹងបន្តកើនឡើងកាន់តែច្រើនទៀតនាពេលអនាគតក្រុមហ៊ុនកាន់តែច្រើនកំពុងតែស្វែងរកឱកាសក្នុងការកាន់កាប់យូនីតការិយាល័យដាច់តែឯងក្នុងអគារសហកម្មសិទ្ធិច្រើនសម្រាប់ជាឯកជនភាពរបស់ខ្លួន។
លោកស្រីបានថ្លែងថា ៖ «កត្តា ចម្បងដែលជំរុញឲ្យក្រុមហ៊ុននាំគ្នាទិញលំហការិយាល័យឯកជនគឺជាការកាន់កាប់ដែលមាននិរន្តរភាពនិងសុវត្ថិភាពដែលជួយការ ពារពួកគេពីការឡើងថ្លៃជួលហួស ហេតុជាពិសេសនៅពេលដែលទីផ្សារការិយាល័យស្ថិតនៅក្នុងស្ថានភាពដែលមានតម្រូវការច្រើន។
ក្រៅពីការមានអំណាចគ្រប់គ្រងខ្លាំងជាងមុនលើថ្លៃកាន់កាប់ក្នុងរយៈពេលយូរអង្វែងការរំពឹងទុកថានឹងមានការទទួលស្គាល់តម្លៃ ពិតប្រាកដនៃអចលនទ្រព្យនៅក្នុង ទីផ្សារជាកត្តាជំរុញមួយទៀត។
ក្រុមហ៊ុនដែលកំពុងធ្វើការពិចារណាជ្រើសរើសជម្រើសនៃការទិញការិយាល័យ រំពឹងទុកថាខ្លួននឹងទទួលបានអត្ថប្រយោជន៍ពីការលក់អចលនទ្រព្យដែលខ្លួនបានទិញយកនោះនៅក្នុងតម្លៃដែលខ្ពស់ជាងតម្លៃដើមឆ្ងាយលើសលប់នៅពេលដែលពួកគេចង់ធ្វើការផ្លាស់ប្តូរទីតាំង។
«ការរំពឹងទុកបែបនេះវាពិតជាការសម្រេចចិត្តអាជីវកម្មដែលមានសក្តានុភាព ពីព្រោះតម្លៃមូល ធននៃទ្រព្យសកម្មការិយាល័យនឹងឡើងថ្លៃនាពេលអនាគត ដោយផ្អែកទៅលើទិដ្ឋភាពដែលពោរពេញដោយសុទិដ្ឋនិយមនៃទីផ្សារការិយាល័យនៃទីក្រុងបាងកកដែលនឹងបន្តមានអត្រាកាន់កាប់ច្រើន ប៉ុន្តែតម្លៃខ្ពស់ខ្លាំង»។
តាមការសង្កេតដោយ JLL បានបង្ហាញថាក្រុមហ៊ុនភាគច្រើនកំពុងតែពិចារណាយកជម្រើសការទិញដាច់ការិយាល័យដោយភាគច្រើនពួកគេកំពុងតែស្វែងរកនូវយូនីតការិយាល័យ ដែលមានទំហំពី ៤០០ ម៉ែត្រការេទៅ ២០០០ ម៉ែត្រការ៉េ នៅក្នុងអគារដែលមានទីតាំងល្អៗ និងមានគុណភាពគ្រាន់បើណាមួយ។
យ៉ាងណាមិញ ការផ្គត់ផ្គង់នៃការិយាល័យដែលមានលក្ខណៈទាំងអស់នេះ ហើយកំពុងត្រូវបានគេដាក់លក់នោះគឺមានចំនួនតិចតួចបំផុត។
គេឃើញមានអគារការិយាល័យកម្មសិទ្ធិច្រើនមួយចំនួនដែល មានយូនីតការិយាល័យបែបឯកជន (ដែលគេអាចហៅម្យ៉ាងទៀតបានថា ជាខុនដូការិយាល័យ)។ ឧទាហរណ៍ដូចជា អគារការិយាល័យ Lake Rajada Office Complex, CTI Tower, SathornThani និង S.P. Tower ជាដើម។
អគារទាំងអស់នេះត្រូវបានអភិវឌ្ឍរវាងទស្សវត្សរ៍ ១៩៨០ និង ១៩៩០ នៅពេលដែលអគារការិយាល័យកម្មសិទ្ធិច្រើននៅមានតម្លៃសមរម្យដោយសារតែមាននៅសល់ដីទំនេរច្រើនថែមទាំងដីទាំងនោះមានតម្លៃថោកទៀតផង។
អ្នកទិញមានរួមទាំង ក្រុមហ៊ុនដែលទិញយូនីតណាមួយសម្រាប់ការប្រើប្រាស់ផ្ទាល់ខ្លួន និងបុគ្គលជាវិនិយោគិនដែលទិញយូនីតទាំងនេះដើម្បីជួលបន្ត។
អគារទាំងនេះមួយចំនួនត្រូវបានកាន់កាប់ជារួមដោយអ្នកអភិវឌ្ឍដែលទិញយកយូនីតទាំងនោះសម្រាប់ការប្រើប្រាស់ផ្ទាល់ខ្លួន និងការជួលបន្ត។
ខណៈពេលដែលមិនមានការអភិវឌ្ឍថ្មីនៃអគារសហកម្មសិទ្ធិច្រើននៅទីក្រុងបាងកកចាប់តាំងពីវិបត្តិហិរញ្ញវត្ថុអាស៊ីឆ្នាំ ១៩៩៧ មកស្ថានភាពដ៏ល្អនៃទីផ្សារការិយាល័យនៅទីក្រុងបាងកក មិនបានលើកទឹកចិត្តឲ្យម្ចាស់អគារសហកម្មសិទ្ធិជាច្រើនលក់ចោលយូនីតរបស់ពួកគេនោះទេដែលធ្វើឲ្យក្រុមហ៊ុនដទៃទៀតមានភាពលំបាកក្នុងការស្វែងរកការិយាល័យដែលដាក់លក់នាពេលនេះ។
លោកស្រី Yupaបានថ្លែងថា ៖ «អគារការិយាល័យសហកម្មសិទ្ធិដែលមានទីតាំងនិងមានការថែរក្សាបានល្អបន្តទទួលបានការជួលមិនដកឃ្លា ដូច្នេះសហម្ចាស់កម្មសិទ្ធិនៃអគារទាំងនេះមិន មានបំណងចង់លក់ទ្រព្យសម្បត្តិរបស់ពួកគេទេ។ យ៉ាងណាមិញ មានការិយាល័យជាច្រើនដែលបាន ដាក់លក់ប៉ុន្តែការិយាល័យទាំងនោះមិនមានភាពជោគជ័យក្នុងការស្វែងរកអ្នកទិញដោយសារតែស្ថានភាពថែទាំមិនបានល្អរបស់អគារការិយាល័យទាំងនោះដែលបណ្តាលមកពីកង្វះការគ្រប់គ្រងទ្រព្យ អចលនទ្រព្យ ទីតាំងមិនសូវល្អ និងការកំណត់តម្លៃមិនត្រឹមត្រូវ»។
ក្រៅពីនេះក៏នៅមានជម្រើសកម្មសិទ្ធិមួយចំនួនទៀតដែលអ្នកកាន់កាប់ក្រុមហ៊ុនអាចពិចារណាបាន។
ឧទាហរណ៍មានអគារការិយាល័យឯករាជ្យតូចៗមួយចំនួនដែលកំពុងតែត្រូវបានដាក់លក់។ ខណៈពេលដែលអគារទាំងនេះអាចមានទីតាំងមិនសូវល្អដូចអ្វីដែលក្រុមហ៊ុនចង់បាន អគារទាំងនេះអនុញ្ញាតឲ្យម្ចាស់កម្មសិទ្ធិមានអំណាចគ្រប់គ្រងពេញលេញលើអចលនទ្រព្យរបស់ពួកគេនាំឲ្យពួកគេទទួលបានអត្ថប្រយោជន៍បន្ថែមទៅលើការមិនចាំបាច់បង់ថ្លៃកាន់កាប់យូរអង្វែង។អចលនទ្រព្យអាចត្រូវបានតុបតែងឡើងវិញ ដើម្បីឲ្យសមស្របទៅនឹងតម្រូវការអាជីវកម្មនិងប្រតិបត្តិការរបស់ពួកគេ។
លោកស្រីបានបញ្ចប់ការបញ្ចេញមតិជាមួយនឹងប្រសាសន៍ថា ៖ «ទោះជាយ៉ាងណាក៏ដោយ ជម្រើសអចលនទ្រព្យទាំងអស់សុទ្ធតែមានគុណសម្បត្តិនិងគុណវិបត្តិរៀងៗខ្លួន។ ក្រុមហ៊ុនត្រូវតែថ្លឹងថ្លែងគុណសម្បត្តិនិងគុណវិបត្តិនៃជម្រើសនីមួយៗដោយគិតទៅលើគោលដៅអាជីវកម្មរយៈពេលវែងរបស់ពួកគេ និងផ្អែកទៅលើព័ត៌មានត្រឹមត្រូវនិងពេញលេញអំពីអចលនទ្រព្យជាក់លាក់ដែលពួកគេចង់វិនិយោគនៅក្នុងទីផ្សារការិយាល័យនៅទីក្រុងបាងកក៕