Hot line: +855 (0)99 283 388
នៅទីក្រុងភ្នំពេញ លោកអ្នកប្រាកដជាឃើញអគារលំនៅដ្ឋានបែប អាផាតមិន (apartment) ខ្ពស់ទាប ស្អេកស្កះ ស្ទើរគ្រប់ទីកន្លែង។ ប៉ុន្តែ តើខណ្ឌណាដែលមានលំនៅដ្ឋានបែប អាផាតមិន ច្រើនជាងគេបំផុត?
ខណ្ឌចម្ការមន នៅតែបន្តជាកន្លែងដ៏មានប្រជាប្រិយភាពបំផុតសម្រាប់តំបន់លំនៅដ្ឋានបែបអាផាតមិន ដោយ ៥៣% នៃ អាផាតមិន ទាំងអស់ ស្ថិតនៅក្នុងខណ្ឌមួយនេះ។ នេះបើយោងតាមរបាយការណ៍ថ្មីបំផុតមួយ ចេញផ្សាយដោយ Knight Frank ដែលជាក្រុមហ៊ុនប្រឹក្សាយោបល់អចលនទ្រព្យឯករាជ្យដែលមានការិយាល័យចំនួន៣៣៥ជុំវិញពិភពលោក រួមទាំងនៅកម្ពុជាផងដែរ។
របាយការណ៍ពាក់កណ្តាលឆ្នាំនេះ ខណ្ឌដូនពេញស្ថិតក្នុងលំដាប់លេខ ២ ដោយមានលំនៅដ្ឋានអាផាតមិន ចំនួន ១៤% ខណៈដែលអាផាតមិនផ្សេងៗទៀតស្ថិតនៅខណ្ឌទួលគោក ខណ្ឌ៧មករា ខណ្ឌជ្រោយចង្វារ ខណ្ឌមានជ័យ និងខណ្ឌសែនសុខ។
គិតត្រឹមចុងឆ្នាំ២០១៧ ក្រុមហ៊ុន Knight Frank បាននិយាយថា មានលំនៅដ្ឋានបែបអាផាតមិន សរុបចំនួន១០៥៩ ក្នុង ២៥គម្រោង ដែលតួលេខនេះឆ្លុះបញ្ចាំងពីការកើនឡើងនៃការផ្គត់ផ្គង់ ២៣% បើធៀបនឹង ៦ខែចុងក្រោយ ក្នុងឆ្នាំ២០១៦។
ទោះបីជាមានក្តីបារម្ភពីការផ្គត់ផ្គង់លើសតម្រូវការក្តី វិស័យអាផាតមិនបានទទួលអត្រាស្នាក់នៅប្រមាណ ៧០% ក្នុងរយៈពេល៦ខែនៃឆ្នាំ២០១៧នេះ។
Knight Frank អះអាងថា នេះអាចដោយសារតែអ្នកជួលបានទទួលផលប្រយោជន៍ ពីសម្ពាធធ្លាក់ចុះតម្លៃជួលប្រចាំខែ។
តម្លៃជួលទាបបានលើកទឹកចិត្តឲ្យមានការផ្លាស់ពីការរស់នៅកន្លែងស្នាក់នៅបែបប្រពៃណីមកជាការរស់នៅបែបទំនើបដែលមានផាសុកភាព ហើយមានតម្លៃសមរម្យថែមទៀត។
អ្នកដែលជួលអាផាតិមិន គឺភាគច្រើនជាជនបរទេសដែលធ្វើការនៅភ្នំពេញ និងមានចំនួនតិចតួចទៀត គឺជាប្រជាជនកម្ពុជាដែលបានកើតនិងធំធាត់នៅបរទេស ហើយដែលមានឆន្ទៈ តាំងទីលំនៅក្នុងប្រទេសដើមកំណើតរបស់ខ្លួន។
ការស្នាក់នៅជាធម្មតានៃប្រជាជនកម្ពុជា គឺនៅតែជាលក្ខណៈលំនៅដ្ឋានដែលមានដីជុំវិញបន្តិចបន្តួច ឬធំទូលាយ ដែលមានសាលារៀននិងផ្សារនៅក្បែរជាដើម៕