Hot line: +855 (0)99 283 388
ខុសពីគម្រោងអចលនទ្រព្យជាច្រើននៅកម្ពុជាដែលកំពុងយកចិត្តទុកដាក់ជាសំខាន់ទៅលើទីផ្សារលំនៅឋានការិយាល័យសម្រាប់ជួល ឬក៏ទីផ្សារទំនើបទាន់សម័យនោះ អ្នកវិនិយោគគម្រោង Oriental បានសម្លឹងទៅលើអ្វីប្លែកពីគេដោយរំពឹងទីផ្សារគោលដៅផ្នែកប្រពៃណី និងខាងវប្បធម៌ តាមរយៈការវិនិយោគសាងសង់ជា សាលមហោស្រពសម្តែងសិល្បៈ សណ្ឋាគារ ផ្សារទំនើបបែបបុរាណសម្រាប់លក់គ្រឿងសម្ភារទាក់ទងវិស័យទេសចរណ៍ និងវប្បធម៌។
លោក ShuWen He នាយកគ្រប់គ្រងទូទៅ Oriental Entertainment Co., Ltd. បានថ្លែងតាមរយៈអ្នកបកប្រែភាសាចិនថា ការវិនិយោគលើគម្រោង Oriental លើកទី១ នៅទីក្រុងភ្នំពេញ គឺគ្រាន់តែជាការចាប់ផ្តើមជំហានដំបូងតូចមួយរបស់ក្រុមហ៊ុនតែប៉ុណ្ណោះ ខណៈក្រុមហ៊ុននេះមានទស្សនវិស័យវែងឆ្ងាយយូរអង្វែងសម្រាប់ការចូលរួមលើកស្ទួយជាជីវភាពរស់របស់ប្រជាជននៅក្នុងប្រទេសកម្ពុជា ស្របពេលដែលក្រុមហ៊ុនដើមរបស់ខ្លួននៅឯប្រទេសចិន ទទួលបានជោគជ័យលើការវិនិយោគផ្នែកសាលមហោស្រពជាច្រើនទីតាំងនៅឯប្រទេសចិន រាប់តាំងពីក្រុងប៉េកាំង រហូតបណ្តាខេត្តធំៗដល់ប៉ែកនិរតីនៃប្រទេសចិន។
គម្រោង Oriental បានចាប់ផ្តើមបើកការដ្ឋានសាងសង់អគាររបស់ខ្លួនកាលពីខែមុននេះ នៅលើផ្ទៃដីទំហំជាង ៥ ០០០ ម៉ែត្រការ៉េ ស្ថិតនៅតាមផ្លូវគីមអ៊ីលស៊ុងនៃតំបន់ពាណិជ្ជកម្មខណ្ឌទួលគោក។
តាមការពន្យល់របស់លោក He បានឲ្យដឹងថា ៖ «អគារពហុវប្បធម៌នេះនឹងសាងសង់ជារាងអក្សរ L មានកម្ពស់ ៧ជាន់ ព័ទ្ធជុំវិញរោងមហោស្រពដ៏ធំមួយដែលអាចផ្ទុកអ្នកទស្សនាបានរហូត ៥០០នាក់»។
«នៅពេលសាងសង់រួចរាល់គម្រោងអគារទាំងមូលនឹងមានផ្ទៃក្រឡាសរុប ២៤ ៧៨០ ម៉ែត្រការ៉េ បែងចែកជាមហោស្រព ៥០០០, សណ្ឋាគារ ១២០០, ផ្សារទំនើបរបៀបក្លាស៊ិកទំហំ ២០០០ម៉ែត្រការ៉េ» នេះបើតាមប្រសាសន៍របស់លោក He។ «គម្រោងវិនិយោគនេះនឹងចំណាយអស់៣២,៧០លានដុល្លារ ដោយគ្រោងនឹងបញ្ចប់នៅត្រឹម ខែតុលា-ធ្នូ ២០១៨»។
នៅក្នុងបរិវេណអគាររាងអក្សរ L នោះ នឹងមានជាហាងលក់ទំនិញទំនើបៗបែបបុរាណ ភោជនីយដ្ឋាន និងសណ្ឋាគារដ៏ប្រណីតមួយទៀត។
លោក He បញ្ជាក់ថា ៖ «សណ្ឋាគារ Oriental គឺមានតែ៥៦បន្ទប់ប៉ុណ្ណោះ ប៉ុន្តែនៅតាមបន្ទប់នីមួយៗមានផ្ទៃក្រឡាធំទូលាយនឹងរៀបចំរចនាឡើងទៅតាមប្រពៃណី និងវប្បធម៌របស់ជនជាតិអាស៊ី ខុសប្លែកៗដាច់ពីគ្នាតែម្តង ដូចជាតាមរបៀបវប្បធម៌ ខ្មែរ វប្បធម៌ចិន រួមទាំងបណ្តាជនជាតិអាស៊ាន និងជាតិសាសន៍អាស៊ីដទៃទៀត»ផងដែរ។
លោក He បានបន្តថា តាមការគ្រោងទុកតម្លៃសំបុត្រចូលទស្សនាការសម្តែងសិល្បៈមួយលើករយៈពេល ៩០-១០០ នាទីនោះ គឺតម្លៃសំបុត្រប្រមាណ ៣០ ដុល្លារសម្រាប់មនុស្សពេញវ័យ ដោយឡែកសម្រាប់មន្ត្រីរាជការកម្ពុជា និងសិស្ស និស្សិត ក្រុមហ៊ុននឹងផ្តល់ការលក់ជូនសំបុត្រជាពិសេសហើយភ្ញៀវទាំងអស់នឹង ទទួលបានអាហារសម្រន់ដោយអត់គិតថ្លៃ។
លោកបន្តថា ៖ «ក្រុមហ៊ុនរំពឹងថា នឹងមានភ្ញៀវទេសចរជាតិ និងអន្តរជាតិច្រើនចូលទស្សនាការសម្តែងសិល្បៈតាមបែបប្រវត្តិសាស្ត្រ និងវប្បធម៌របស់កម្ពុជាទាំងនេះ»។ ប៉ុន្តែលោកពុំបានបង្ហាញពីការគ្រោងទុកនៃការជួលឬលក់គម្រោងនេះទេ ដោយលោកគ្រាន់តែឲ្យដឹងថា វានឹងមានពាណិជ្ជករផ្សេងចូលរួមនៅក្នុងទីផ្សាររបស់ខ្លួន។
លោក ថៃ នរៈសត្យា មន្ត្រីអ្នកនាំពាក្យក្រសួងវប្បធម៌ និងវិចិត្រសិល្បៈ បានសម្តែងការសាទរចំពោះរាល់ការវិនិយោគ ឬគម្រោងអភិវឌ្ឍន៍ទាំងឡាយណាដែលគោរពទៅតាមច្បាប់របស់ព្រះរាជាណាចក្រកម្ពុជា ដើម្បីទទួលបានវឌ្ឍនភាពទាំងអស់គ្នា។
លោកបន្តថា ជាធម្មតាបើគម្រោងវិនិយោគណាមួយធ្វើការពាក់ព័ន្ធទៅនឹងដែនសមត្ថកិច្ចក្រសួងណាមួយ នោះគឺសាមីក្រសួងនោះនឹងមានកាតព្វកិច្ចចូលរួមតាមដាន ឬសហការហើយ។
មន្ត្រីអ្នកនាំពាក្យរូបនេះបានលើកឧទាហរណ៍បញ្ជាក់ថា នៅពេលដែលអ្នកវិនិយោគគេចាប់ផ្តើមសាងសង់គម្រោងអ្វីមួយ គឺដាច់ខាតគេត្រូវមានច្បាប់អនុញ្ញាតរបស់ក្រសួងរៀបចំដែនដី នគរូបនីយកម្ម និងសំណង់ ឬអាជ្ញាធរក្រុង។
«លុះដល់ពេលគេចាប់ផ្តើមធ្វើអាជីវកម្មពាក់ព័ន្ធទៅនឹងវិស័យណាមួយ ដែលទាក់ទងទៅនឹងជំនាញរបស់ក្រសួងណាមួយដូចជាផ្នែកវប្បធម៌ និងទេសចរណ៍ គឺដាច់ខាតត្រូវមានការត្រួតពិនិត្យ និងកិច្ចសហការពីមន្ត្រីជំនាញរបស់ក្រសួងវប្បធម៌ និងវិចិត្រសិល្បៈ ឬក៏ក្រសួងទេសចរណ៍ដែរ» នេះបើតាមប្រសាសន៍របស់លោក នរៈសត្យា។ «បើទាក់ទងផ្នែកវប្បធម៌ ឬប្រវត្តិសាសន៍ នោះត្រូវមានមន្ត្រីជំនាញរបស់យើងលោកតាមដានត្រួតពិនិត្យ និងសហការ ដោយខានពុំបាន ព្រោះយើងបារម្ភពីភាពឆកល្វែងដែលធ្វើឲ្យប៉ះពាល់ដល់ប្រពៃណី វប្បធម៌ និងប្រវត្តិសាស្ត្ររបស់ខ្មែរ»។
ការចូលរួមសហការត្រួតពិនិត្យរបស់មន្ត្រីជំនាញ ក៏ជាផ្នែកមួយដើម្បីធ្វើឲ្យគម្រោងការវិនិយោគកាន់តែប្រសើរ និងទទួលបានជោគជ័យផងដែរ។
លោក នរៈសត្យា បានបញ្ជាក់ថា ៖ «គម្រោងវិនិយោគពាក់ព័ន្ធនឹងវិស័យទេសចរណ៍ វប្បធម៌ របៀបនេះមានពីរបីហើយនៅសៀមរាប ហើយពួកគេទទួលបានការគាំទ្រច្រើន»។
លោក អាង គឹមអ៊ាង អតីតប្រធានសមាគមទីភ្នាក់ងារទេសចរណ៍កម្ពុជា (CATA) បានអបអរសាទរនឹងព័ត៌មានពាក់ព័ន្ធនឹងគម្រោង Oriental នេះថា ៖ «វាគឺជាផ្នែកមួយនៃផលិតផលទេសចរថ្មី សម្រាប់ការទាក់ទាញភ្ញៀវទេសចរបរទេសដែលចូលមកប្រទេសកម្ពុជាកាន់តែច្រើននៅក្នុងពេលខាងមុខនេះ»។
«ជាធម្មតានៅតាមបណ្តាប្រទេសដែលទទួលបានជោគជ័យក្នុងវិស័យទេសចរណ៍ គេតែងតែបង្កើតផលិតផលទេសចរណ៍ថ្មីៗបន្ថែមជានិច្ច» នេះបើតាមសម្តីរបស់លោក គឹមអ៊ាង៕