ដើម្បីទិញផ្ទះតម្លៃទាបរបស់ក្រុមហ៊ុន Worldbridge Land Cambodia ស្ថិតនៅតាម​បណ្តោយ​ផ្លូវ​ជាតិ​លេខ​២១ ក្នុង​ឃុំ​រកា​ខ្ពស់ ស្រុក​ស្អាង ខេត្ត​កណ្តាល មានចម្ងាយ ប្រមាណ ៨​គីឡូម៉ែត្រ ពី​ទីក្រុង​តាខ្មៅ មិនត្រូវមានប្រាក់ខែលើសពី៥០០ដុល្លារអាមេរិកទេ។

នៅក្នុងបទសំភាសន៍តាមរយៈទូរសព្ទ លោក ឧញ៉ា សៀ ឬទ្ធីបានប្រាប់ពាណិជ្ជកម្មកម្ពុជាថា ដើម្បីទិញផ្ទះតម្លៃទាបរបស់លោកបានត្រូវមានលក្ខខណ្ឌដូចជា៖

1. ប្រជាពលពលរដ្ឋទាំងអស់មិនត្រូវមានប្រាក់ខែលើស ៥០០ដុល្លារ
2. ត្រូវតែជាអ្នករៀបការរួច
3. ទិញ​ហើយ​មិន​នៅ​មិន​អាច​យក​ទៅ​ជួល​និង​លក់​បន្ដ លុះត្រា​តែ​៥​ឆ្នាំ​ក្រោយ ទើប​អាច​ជួល​និង​លក់​បន្ដ​បាន។
4. រាល់​ការ​ទទួល​ទិញ​លក់​និង​កក់ ក្រុមហ៊ុន​និង​ក្រសួង​រៀបចំ​ដែនដី នគរូបនីយកម្ម និង​សំណង់ ជា​អ្នក​ពិនិត្យ​ដោយ​ផ្ទាល់។
5. តម្លៃ​ផ្ទះ​ចាប់​ពី ២​ម៉ឺន ៥​ពាន់​ដុល្លារ ទៅ ៣​ម៉ឺន​ដុល្លារ អាស័្រយ​ទៅ​តាម​ប្រភេទ​ផ្ទះ​និង​ទំហំ។
6. មិន​អនុញ្ញាត​ឲ្យ​អ្នក​មាន​លុយ​ទិញ​ទុក​សម្រាប់​ធ្វើ​អាជីវកម្ម​នោះ​ទេ។

គួរជម្រាបផងដែរថា ផ្ទះ​ដែល​ត្រូវ​សាងសង់ មាន ២២៩៧​ល្វែង ដែលមួយល្វែងមានតម្លៃចន្លោះពី ២ម៉ឺន ទៅ ៣ម៉ឺនដុល្លារអាមេរិក ខណៈបច្ចុប្បន្ន​ក្រុម​ហ៊ុន​កំពុង​ដំណើរ​ការ​ចាក់​ដី និង​រៀបចំការដ្ឋាន​សាងសង់ ហើយ​គ្រោង​នឹង​ចាប់​ផ្ដើម​ដំណើរ​ការ សាង​សង់​នៅ​មុន​បំណាច់​ឆ្នាំ ២០១៧នេះ ។