Hot line: +855 (0)99 283 388
រាជធានីភ្នំពេញ ៖ សកម្មភាពទិញ-លក់ដីធ្លីក្នុងវិស័យអចលនទ្រព្យកំពុងតែកក្រើកខ្លាំងឡើងៗនៅជាយរាជធានី និងបណ្ដាខេត្តសក្ដានុពលសេដ្ឋកិច្ចសំខាន់ៗមួយចំនួន ។ ជាពិសេស រយៈពេល១ឆ្នាំចុងក្រោយនេះ អ្នកវិនិយោគទាំងក្នុង និងក្រៅស្រុកបាននិងកំពុងវិនិយោគលើវិស័យមួយនេះយ៉ាងសកម្ម ដោយទិញដីស្រែចម្ការប្រជាពលរដ្ឋ រួចរៀបចំហេដ្ឋារចនាសម្ព័ន្ធផ្លូវថ្នល់ តបណ្ដាញទឹកភ្លើង និងពុះចែកជាឡូត៍លក់យ៉ាងមមាញឹក ។ ចំណែកនៅក្នុងយុទ្ធសាស្ត្រទិញ-លក់ដីធ្លីនេះ អ្នកវិនិយោគក៏ដើរតាមលំនាំអ្នកអភិវឌ្ឍន៍លំនៅឋាន ខុនដូ ឬអគារពាណិជ្ជកម្មផងដែរ ដោយប្រើវិធីបង់រំលស់ និងមានរយៈពេលកំណត់ច្រើនឆ្នាំដូចគ្នា ។ ដូច្នេះ សម្រាប់អ្នកដែលចង់ទិញដីធ្លីដោយជ្រើសរើសវិធីបង់រំលស់នេះ តើត្រូវមានផែនការអ្វីខ្លះដើម្បីចៀសវាងមានហានិភ័យ ?
ស្ថាបនិកអចលនទ្រព្យក្រុមហ៊ុន Kampot Property នឹងចែករំលែកនូវបទពិសោធន៍ខ្លះៗទាក់ទងនឹងផែនការនៅពេលលោកអ្នកជ្រើសរើសយកវិធីទិញដីធ្លីបង់រំលស់ ដើម្បីជាចំណេះដឹងបន្ថែមសម្រាប់ពិចារណា និងរៀបចំផែនការមុននឹងធ្វើការសម្រេចទិញដូរដូចខាងក្រោម ៖
លោក សុខ គែន ស្ថាបនិកអចលនទ្រព្យរូបនេះបានថ្លែងថា ៖« មុននឹងសម្រេចទិញដីដោយជ្រើសរើសវិធីបង់រំលស់ យើងត្រូវក្រឡេកមើលស្ថានភាពហិរញ្ញវត្ថុរបស់យើងថា មានលទ្ធភាពរត់រួចដែរឬអត់ ។ ទន្ទឹមនឹងនេះ ត្រូវមើលដែរថា ដីនោះត្រូវនឹងទីផ្សារឬអត់ បើយើងទិញមិនចំនឹងតម្រូវការរបស់មនុស្សទេ គឺប្រឈមនឹងការលក់អត់ចេញ ឬក៏ចំណាយពេលយូរក្នុងការលក់ » ។
ស្ថាបនិកអចលនទ្រព្យរូបនេះបានបន្ថែមថា ចំពោះការស្វែងរកទិញដីធ្លី ត្រូវតែគិតឲ្យបានស៊ីជម្រៅបន្ដិច ពិសេស គម្រោងអភិវឌ្ឍន៍នានារបស់រដ្ឋ ឬក្រុមហ៊ុនវិនិយោគធំៗ ដែលជាឱកាសធ្វើឲ្យដីធ្លីនៅតំបន់នោះឡើងថ្លៃជាដើម ។
លោក សុខ គែន ថ្លែងថា ៖« បើយើងទិញត្រូវនឹងតំបន់ដែលមានសក្ដានុពល និងមានតម្លៃគួរសម អាចថានៅត្រឹមទីផ្សារ ឬក្រោមទីផ្សារនោះកាន់តែល្អ ហើយត្រូវរកដីនៅជាយក្រុង ដែលមានចម្ងាយ៥គីឡូម៉ែត្រពីជុំវិញក្រុង ព្រោះវាមានតម្លៃថោក និងអាចលក់ចេញវិញបានថ្លៃ » ។ ទោះបីយ៉ាងណា លោកបានផ្ដល់ជាយោបល់ថា ក្រៅពីគិតគូរ និងសម្លឹងមើលបញ្ហាខាងលើនេះហើយ អ្នកទិញក៏ត្រូវគិតទៅលើផ្នែកច្បាប់ផងដែរ ។
លោកបន្ដថា ៖« ការទិញ-លក់ក្នុងវិស័យអចលនទ្រព្យ សំខាន់បំផុត គឺត្រូវក្រឡេកមើលប្លង់កម្មសិទ្ធិ និងសួរនាំឲ្យបានច្បាស់ថា គេអាចផ្ដល់កម្មសិទ្ធិឲ្យយើងបានត្រឹមណា ដើម្បីចៀសវាងបញ្ហានៅថ្ងៃក្រោយ » ។
បើតាមការឲ្យដឹងពីទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting លោក ង៉ែត ជូ បានថ្លែងតាមទូរស័ព្ទកាលពីថ្ងៃទី៥ តុលា ថា ការបង់រំលស់ដីធ្លី មិនថា ធ្វើផ្ទះ ឬសម្រាប់ធ្វើអាជីវកម្មទេ វាសុទ្ធតែល្អ ព្រោះការបង់រំលស់មានរយៈពេលយូរ ដែលអាចឲ្យអ្នកបង់រំលស់មានពេលគ្រប់គ្រាន់ក្នុងការរកប្រាក់មកបង់ ប៉ុន្តែសំខាន់គឺគាត់ច្បាស់លាស់ក្នុងការបង់រំលស់នោះ ដើម្បីកុំឲ្យមានបញ្ហាពេលក្រោយ ។
លោកថា ៖« មិនថាអ្នកលក់ ឬអ្នកទិញទេ ការបង់រំលស់ គឺត្រូវសិក្សាឲ្យច្បាស់ពីស្ថានភាពដី និងទីកន្លែងថា មានទឹក ភ្លើង និងផ្លូវគ្រប់គ្រាន់ឬអត់ ។ មួយទៀត ត្រូវសុំមើលប្លង់ដីជាមុនសិន ចៀសវាងការទិញទៅមានបញ្ហា ជាពិសេស ត្រូវច្បាស់ថា យើងមានសមត្ថភាពធ្វើការបង់រំលស់ឬអត់ ? » ៕